January 10, 2021

ក្រុម​ការងារ​អន្តរក្រសួង​ប្រជុំ​ពិភាក្សា​ពី​គម្រោង​ទិញ​​វ៉ាក់សាំង​ការពារ​ជំងឺ​កូវីដ​១៩​ជាបន្ទាន់

ក្រុម​ការងារ​អន្តរក្រសួង​ប្រជុំ​ពិភាក្សា​ពី​គម្រោង​ទិញ​​វ៉ាក់សាំង​ការពារ​ជំងឺ​កូវីដ​១៩​ជាបន្ទាន់ រូប​តំណាង​មេរោគ ​កូរ៉ូណាវីរុស (Coronavirus) ឬ​ហៅ​ម្យ៉ាង​ទៀត​ថា វីរុស សារស៊ីអូវី-២ (SARS-Cov-2) AFP


ដោយ ​ខែ សុណង RFA 2021-01-09

ក្រុម​ការងារ​អន្តរក្រសួង បាន​ជួប​​​​​​ប្រជុំ​គ្នា​ជា​លើកដំបូង ដើម្បី​ពិភាក្សា​ពី​យុទ្ធសាស្ត្រ​និង​ផែនការ​ពន្លឿន​ការទិញ​វ៉ាក់សាំង​ការពារ​ជំងឺ​កូវិដ​១៩ (Covid-19) សម្រាប់​ពលរដ្ឋ​ខ្មែរ។

រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ លោក វង្សី វិស្សុត ដែល​ជា​ប្រធាន​ក្រុមការងារ​អន្តរក្រសួង​ដឹកនាំ​កិច្ចប្រជុំ​កាលពី​ថ្ងៃ​ទី៨ ខែ​មករា ត្រូវ​ទីភ្នាក់ងារ​សារព័ត៌មាន​កម្ពុជា (AKP) ដកស្រង់​សំដី​ថា កម្ពុជា​នឹង​ទិញ​វ៉ាក់សាំង​ពី​ក្រុមហ៊ុន ដែល​ប្រើប្រាស់​មាន​សុវត្ថិភាព និង​ប្រសិទ្ធភាព​ខ្ពស់ និង​ត្រូវ​​​​បាន​ទទួលស្គាល់​ដោយ​អង្គការ​សុខភាព​ពិភពលោក​(WHO)​។ លោក​បន្ត​ថា រហូត​មក​ដល់​ពេលនេះ អង្គការ​សុខភាព​ពិភពលោក ទទួលស្គាល់​វ៉ាក់សាំង​ផលិត​ដោយ ក្រុមហ៊ុន ហ្វាយហ្សឺ និង​បាយអូអេនថិក (Pfizer/BioNTech) នៃ​សហរដ្ឋអាមេរិក និង​អាល្លឺម៉ង់។ ប៉ុន្តែ​លោក​ថា ការ​ចែកចាយ​វ៉ាក់សាំង​បច្ចុប្បន្ន​នេះ គឺ​នៅ​មាន​កម្រិត សម្រាប់​ប្រើប្រាស់​ជាបន្ទាន់​តែប៉ុណ្ណោះ មិនមែន​សម្រាប់​ការ​ចាក់​វាក់​ស៊ាំ​ង​ជាទូទៅ​នោះ​ទេ​។ កិច្ចប្រជុំ​ក៏បាន​ពិភាក្សា​ពី​គម្រោង​ចំណាយ​ថវិកា ក្នុង​នោះ​រួមមាន ថវិកាជាតិ ប្រាក់​ជំនួយ​និង​កម្ចីសម្បទាន​ពី​ដៃគូ​អភិវឌ្ឍន៍​ទ្វេភាគី​និង​ពហុភាគី ព្រមទាំង​ប្រាក់ ឩ​ប​ត្ថ​ម្ភ ពី​សាធារណជន។ កម្ពុជា បាន​ទទួល​ថវិកា​ពី​សប្បុរសជន សរុប​ជាង ៥៦​លាន​ដុល្លារ ដើម្បី​ត្រៀម​ទុក​សម្រាប់ ទិញ​វ៉ាក់សាំង​កូវីដ​១៩ ចំនួន ១​លាន​ដូស (Dose) ដើម្បី​ចាក់​ជូន​ប្រជាពលរដ្ឋ​ប្រមាណ ៥០​ម៉ឺន​នាក់ ដោយ​ឥតគិតថ្លៃ។

លោកនាយក​រដ្ឋមន្ត្រី ហ៊ុន សែន កាល​ពី​ចុង​ខែ​ធ្នូ ឆ្នាំ​២០២០ បាន​បញ្ជាក់​ថា កម្ពុជា​មាន​លទ្ធភាព​មួយ​ចំនួន ក្នុង​ការទិញ​វ៉ាក់សាំង​ប្រឆាំង​ជំងឺ COVID-19 ដោយ​ទី​១ គឺ​តាមរយៈ​កូវ៉ាក់ (COVAX), ទី​២ តាមរយៈ​ទំនាក់ទំនង​រវាង​ប្រទេស និង​ប្រទេស និង​ទី​៣ គឺ​តាមរយៈ​ក្រុមហ៊ុន​ផ្ទាល់។

បច្ចុប្បន្ន​មាន​ប្រទេស​ជាច្រើន​កំពុង​ផលិត​វ៉ាក់សាំង​ប្រឆាំង​ជំងឺ COVID-19 ក្នុង​នោះ​រួមមាន ទាំង​ប្រទេស​ចិន ឥណ្ឌា រុស្ស៊ី និង​ប្រទេស​នៅ​ក្នុង​តំបន់​អឺរ៉ុប​ជាដើម​។ ប៉ុន្តែ​ក្នុងចំណោម​វ៉ាក់សាំង​ទាំងអស់​នោះ មានតែ​វ៉ាក់សាំង​របស់ ក្រុមហ៊ុន ហ្វាយហ្សឺ និង​បាយអូអេនថិក (Pfizer/BioNTech) ប៉ុណ្ណោះ​ដែល​ទទួលស្គាល់​ដោយ​អង្គការ​សុខភាព​ពិភពលោក៕

No comments: