January 6, 2021

អ្នក​ឃ្លាំមើល​ព្រៃឈើ​ថា មាន​គោយន្ត​មិន​ក្រោម​១ ពាន់​គ្រឿង​ដឹក​ឈើ​ក្នុង​ព្រៃឡង់​ចូល​ក្រុមហ៊ុន​ឯកជន

អ្នក​ឃ្លាំមើល​ព្រៃឈើ​ថា មាន​គោយន្ត​មិន​ក្រោម​១ ពាន់​គ្រឿង​ដឹក​ឈើ​ក្នុង​ព្រៃឡង់​ចូល​ក្រុមហ៊ុន​ឯកជន ទិដ្ឋភាពបទល្មើសព្រៃឈើក្នុងតំបន់ព្រៃឡង់ ក្នុងខេត្តក្រចេះ កាលពីចុងខែធ្នូ ឆ្នាំ ២០២០។ រូប​ពលរដ្ឋ


ដោយ សុជីវី RFA 2021-01-05

សហគមន៍​ព្រៃ​ឡង់ និង​សកម្មជន​បរិស្ថាន ឱ្យ​ដឹង​ថា ឈើ​មូល​ធំៗ និង​ដើមឈើ​ដែល​អ្នកស្រុក​ដុត​យក​ជ័រទឹក​លក់ ឋិត​ក្នុង​ដែន​ជម្រក​សត្វព្រៃ​ឡង់ ត្រូវ​គេ​កាប់​រំលំ​ពេញទំហឹង​។ ប្រជា​សហគមន៍​ថា ឈ្មួញ​យក​ឈើ​ទៅ​លក់ ឱ្យ​មេការ​ក្រុមហ៊ុន​ស៊ីងបាយអូថេក (Think Biotech (Cambodia) Co., Ltd) និង​ក្រុមហ៊ុន​អង្គរ​ផ្លាយវូដ ( Angkor Plywood Co. Ltd) ដែល​មាន​ការដ្ឋាន​ស្តុក​ឈើ​ខ្នាត​ធំ នៅ​ជាប់​ព្រៃឡង់ ខេត្ត​ក្រចេះ។

សកម្មជន​បរិស្ថាន និង​ប្រជា​សហគមន៍​ព្រៃ​ឡង់​ខេត្ត​ក្រចេះ រក​ឃើញ​ថា ក្រុមហ៊ុន​ស៊ីងបាយអូថេក និង​ក្រុមហ៊ុន​អង្គរ​ផ្លាយវូដ បាន​ប្រើ​កម្លាំង​កម្មករ​រាប់​រយ​នាក់ ប្រដាប់​ដោយ​រណា​យន្ត និង​គោយន្ត​មិន​ក្រោម ១​ពាន់​គ្រឿង ធ្វើ​អាជីវកម្ម​ឈើ​ខ្នាត​ធំ ក្នុង​តំបន់​ការពារ​ធម្មជាតិ​មួយ​នេះ​។ ពួកគេ​អះអាង​ថា ឆ្មាំ​អភិរក្ស​របស់​ក្រសួង​បរិស្ថាន ដែល​ដាក់​ពង្រាយ ការពារ​ព្រៃ​នៅ​តំបន់​នោះ បាន​យក​តួនាទី ទៅ​កាង​ឈើ​ឱ្យ​ក្រុមហ៊ុន និង​ក្រុម​ឈ្មួញ​ព្រោះតែ​ផល​ប្រយោជន៍។

ប្រជា​សហគមន៍​ព្រៃ​ឡង់​ខេត្ត​ក្រចេះ ថ្លែង​សុំ​មិន​បញ្ចេញ​ឈ្មោះ ព្រោះ​បារម្ភ​ពី​សុវត្ថិភាព ប្រាប់​អាស៊ីសេរី​ថា គ្រាន់តែ​មេការ​ក្រុមហ៊ុន​ម្នាក់ មាន​គោយន្ត​ដឹក​ឈើ​ជាង ១០០​គោយន្ត និង​មាន​គោយន្ត​រាប់​រយ​គ្រឿង​ផ្សេង​ទៀត កំពុង​សម្រុក​ដឹក​ឈើ​ខុសច្បាប់​ចេញ​ពី​ព្រៃ​ឡង់ ចូល​ការដ្ឋាន​ក្រុមហ៊ុន​ទាំងពីរ​នេះ។ លោក​បញ្ជាក់​ថា ស្ទើរ​ជា​រៀងរាល់​ថ្ងៃ មាន​គោយន្ត​មិន​ក្រោម ១​ពាន់​គ្រឿង បាន​ពង្រាយ​ពេញ​ព្រៃ​ឡង់ ដើម្បី​ដឹក​ឈើ​ធ្វើ​អាជីវកម្ម ដោយ​គ្មាន​ការអនុវត្ត​ច្បាប់​។ លើស​ពី​នេះ​ទៀត មាន​កម្មករ​រាប់​រយ​នាក់ ប្រដាប់​ដោយ​ម៉ាស៊ីន​អារ​ឈើ​ស្វ័យ​ប្រវត្តិ បាន​បោះជំរំ​ក្នុង​ព្រៃ​ឡង់ ដើម្បី​កាប់​ឈើ​ធំៗ នៅ​ចំណុច​អូរ​គ្រាក់ អូរ​អនាម័យ និង​តំបន់​ផ្សេងៗ​ទៀត​។ លោក​ចាត់​ទុក សកម្មភាព​កាប់​ឈើ​ខុសច្បាប់​ទាំងនេះ ជា​ដំណើរ​ឈាន​ទៅ​រក​ការបាត់បង់​ដើមឈើ​ធំៗ​សល់​ចុង​ក្រោយ​៖ «ក្រុមហ៊ុន​ស៊ីងបាយអូថេក និង​អង្គរ​ប្លាយវូដ កំពុង​បូក​គ្នា​កាប់​បំផ្លាញ​ព្រៃ​ឡង់ មួយ​ទំហឹង​បណ្ដោយ​ច្បោះ​ជ័រ​ប្រជាជន​ក៏​មិន​សល់​ដែរ រលីង។ កាប់​ទាំងអស់​ហ្មង គោយន្ត​ជាង ៣​ម៉ឺន​គោយន្ត​នៅ​ក្នុង​ព្រៃ​សព្វថ្ងៃ​ហ្នឹង​។ មន្ត្រី​បរិស្ថាន មិនមែន​ការពារ​ព្រៃឈើ យាម​ក្រុមហ៊ុន វា​ស៊ី​ឈ្នួល​ក្រុមហ៊ុន មើលផ្លូវ​ឱ្យ​ក្រុមហ៊ុន​វិញ​រាល់ថ្ងៃ​ហ្នឹង»។

ចំណែក​សមាជិក​សហគមន៍​ព្រៃ​ឡង់ ខេត្ត​ស្ទឹងត្រែង លោក គង់ រី អះអាង​ថា នៅ​រយៈពេល ៣​ខែ​ចុង​ក្រោយ​នេះ អ្នកភូមិ​កាំងចាម បាត់បង់​ដើម​ច្បោះ​ជ័រ ជាង ១​ម៉ឺន​ដើម ហើយ​ក៏​មាន​អ្នកភូមិ​ខ្លះ​ទៀត បាន​បង្ខំចិត្ត​លក់​ដើមឈើ​ផលិត​ជ័រទឹក ឱ្យ​មេការ​ក្រុមហ៊ុន ព្រោះតែ​ពួកគេ​ភ័យខ្លាច បាត់បង់​ទៅ​ទទេៗ​។ លោក​សង្កេត​ឃើញ​ថា គ្រាន់តែ​ផ្លូវ​មួយ​ច្រក ចូល​ក្នុង​ភូមិសាស្ត្រ​ព្រៃឡង់ ក្នុង​ខេត្ត​ស្ទឹងត្រែង មាន​គោយន្ត​ដឹក​ឈើ​មិន​ក្រោម ១០០​គ្រឿង​នោះ​ទេ​ក្នុង​មួយ​យប់ៗ ឆ្លងកាត់​ទីស្នាក់ការ​ក្រសួង​បរិស្ថាន​។ រីឯ​ឆ្មាំ​អភិរក្ស​របស់​ក្រសួងបរិស្ថាន​ដែល​ឈរជើង​ការពារ​ព្រៃ នៅតែ​ទទួល​សំណូក​ពី​ជនល្មើស ជា​ថ្នូរ​មិន​អនុវត្ត​ច្បាប់​៖ «មន្ត្រី​បរិស្ថាន​នៅ​ហ្នឹង គ្រាន់តែ​ទទួល​ផល​ប្រយោជន៍​ទេ បើ​គេ​ចាប់​គេ​ចាប់​ហើយ គោយន្ត​រាប់​រយ​គ្រឿង ដឹក​តាម​មុខ​ហ្នឹង​គេ​មិន​នេះ​។ អ៊ីចឹង​ប្រជាជន​យើង​ទាំងអស់​គ្នា មានការ​ព្រួយបារម្ភ​បាត់បង់​ច្បោះ​ជ័រទឹក របស់​ពួកគាត់ គាត់​រកស៊ី​នៅ សង្ឃឹម​ច្បោះ​ជ័រទឹក​ហ្នឹងហើយ​។ ប្រជាពលរដ្ឋ​យើង​ភ័យខ្លាច​បាត់បង់ របស់​គាត់​អ៊ីចឹង​ណា»។

សកម្មជន​បរិស្ថាន ដែល​ត្រូវជា​កូនប្រុស​វីរជន​ការពារ​ព្រៃឈើ លោក ឈុត វុទ្ធី គឺ​លោក ឆើយ ឧត្តមរស្មី សង្កេត​ឃើញ​ថា ក្រុមហ៊ុន​ទាំង​នេះ មិន​ត្រឹមតែ​ប្រមូល​ឈើ ក្នុង​តំបន់​ព្រៃ​ឡង់​ទេ ព្រៃ​សហគមន៍​ប្រាសាទ​ទឹកខ្មៅ ក៏​ទទួលរង​ការ​កាប់​ឈើ​ធំៗ ដឹក​ចូល​ការដ្ឋាន​របស់​ក្រុមហ៊ុន​ទាំងនេះ​ដែរ​នៅ​រយៈពេល ៣​ខែ​ចុង​ក្រោយនេះ​។ លោក​ថា បច្ចុប្បន្ន​មាន​រថយន្ត​យី​ឌុប និង​រថយន្ត​ប៉ា​កុង​ជាច្រើន​គ្រឿង កំពុង​ប្រមូល​ឈើ​ធំៗ​ចេញពី​ព្រៃ​ឡង់​ដឹក​ទៅ​លក់​នៅ​ក្រៅ​ប្រទេស៖ «ក្រុមហ៊ុន​ទាំងអស់​ហ្នឹង ប្រមូល​ឈើ​មូល​ចូល​ក្នុង​ក្រុមហ៊ុន ហើយ​ដឹក​ចេញ​មក​តាម ផ្លូវជាតិ​លេខ ៦ មក​ស្តុក​ទុក​នៅ​ក្នុង​ក្រុមហ៊ុន​អង្គរ​ផ្លាយវូដ បន្ទាប់​មក គាត់​ដឹក​ចេញ ពី​ក្រុមហ៊ុន​អង្គរ​ប្លាយវូដហ្នឹង មក​ច្រក​ព្រំដែន អម​សំណរ ហើយ​បញ្ជូន​ទៅ​ប្រទេស​វៀតណាម​។ អាហ្នឹង អ្វី​ដែល​យើង​ស៊ើប​អង្កេត​កន្លង​មក យើង​បាន​ឃើញ»។

ឆ្លើយតប​ការចោទប្រកាន់​នេះ មេការ​ក្រុមហ៊ុន​ស៊ីងបាយអូថេក លោក សំ ណូ បដិសេធ​ថា កម្មករ​ក្រុមហ៊ុន​មិនបាន​កាប់​បំផ្លាញ​ព្រៃឈើ ក្នុង​តំបន់​ព្រៃ​ឡង់ និង​ដើមឈើ​ផលិត​ជ័រទឹក​របស់​អ្នកស្រុក​នោះ​ទេ​។ លោក​អះអាង​ថា ក្រុម​ពលរដ្ឋ​ជាច្រើន​ក្រុម បាន​លួច​ចូល​ព្រៃឡង់ កាប់​ឈើ​លក់ យក​ឈ្មោះ ក្រុមហ៊ុន​ជា​ខែល ហើយ​បច្ចុប្បន្ន​ក្រុមហ៊ុន​កំពុង​ប្រមូល​អនុផល​ព្រៃឈើ ក្នុង​ផ្ទៃដី​ដែល​រដ្ឋាភិបាល​ផ្ដល់​សិទ្ធិ​ឱ្យ​វិនិយោគ​ប៉ុណ្ណោះ៖ «ខ្ញុំ​ទទួលស្គាល់​ថា ពិតជា​កើត​មាន ប៉ុន្តែ​គេ​យកឈ្មោះ​ក្រុមហ៊ុន​លាប ដល់​ពេល​ទល់​ច្រក​ជួប​សមត្ថកិច្ច​ដឹក​ឱ្យ​ក្រុមហ៊ុន ហើយ​ដល់ពេល​ក្រុមហ៊ុន​ខឹង មក​ស្ទាក់​ចាប់​ទន្លេ ឃើញ​ឈើ​នៅ​ទន្លេ​។ ភាគច្រើន​ចោទ​ដោយសារ​ចោទ​ដាក់​ក្រុមហ៊ុន​ពេក​ហើយ បាន​ក្រុមហ៊ុន​មាន​វិធានការ រើស​សន្តិសុខ ២០ ទៅ ៣០ ហ្នឹង​ដាក់​តាម​ក្រវាត់​ព្រំ​ផង ខាង​ក្នុង និង​ខាងក្រៅ ហើយ​ក្រុមហ៊ុន​ខ្ញុំ​ហ្នឹង ប្រឹង​កាយ​ក្រវាត់​ទៀត អត់​ឱ្យ​មាន​ដឹកជញ្ជូន​ឈើ​ពី​ព្រៃឡង់។ បើ​ដឹក​មក សន្តិសុខ​ខ្ញុំ​មាន​សិទ្ធិ​ឃាត់ ហៅ​សមត្ថកិច្ច​មក»។

មេការ​ក្រុមហ៊ុន​រូប​នេះ​ទទួលស្គាល់​ថា ក្រុមហ៊ុន​បាន​ទទួល​ទិញ​ឈើ ពី​ក្រុម​ពលរដ្ឋ​ដឹក​លក់​ឱ្យ​ខ្លួន មាន​មុខ​កាត់ ១​តឹក​កន្លះ បណ្ដោយ​ជាង​១​មួយ​ម៉ែត្រ ដើម្បី​ធ្វើ​កុង​ផ្លាកកេ។ រីឯ​ឈើ​បន្ទះ​ក្តារ និង​ឈើ​ធ្វើ​គ្រឿងផ្ទះ​ផ្សេងៗ​ទៀត មាន​ក្រុម​ឈ្មួញ​ដទៃ ចាំ​ទទួល​ទិញ​ឈើ​ដល់​មូលដ្ឋាន រួច​ដឹក​ចេញ​ក្រៅ តាម​ផ្លូវ​ទឹក។

អាស៊ីសេរី​បាន​ព្យាយាម​ទាក់ទង អ្នកនាំពាក្យ​ក្រសួងបរិស្ថាន លោក នេត្រ ភក្ត្រា តាម​ទូរសព្ទ និង​ផ្ញើ​សារ​តាម​បណ្ដាញ​សង្គម​ស៊ិកណល (Signal) រយៈពេល​៣ ថ្ងៃ​មក​ហើយ ដើម្បី​សុំ​ការ​បំភ្លឺ​រឿង​នេះ តែ​លោក​មិន​ឆ្លើយតប និង​មិន​លើក​ទូរសព្ទ​។ ចំណែក​អ្នកនាំពាក្យ​គណៈកម្មាធិការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី ក៏​មិន​អាច​ទាក់ទង​បាន​ដែរ នៅ​ថ្ងៃ​ទី៤ មករា​នេះ។

កាលពី​ខែ​មិថុនា ឆ្នាំ​២០១២ ក្រសួង​កសិកម្ម បាន​ផ្ដល់​សិទ្ធិ​ឱ្យ​ក្រុមហ៊ុន ស៊ីងបាយអូថេក វិនិយោគ​ដំណាំ​ឧស្សាហកម្ម អាកាស្យា ឬ​ស្ថានីយ​ស្ដារ​ព្រៃឈើ​ឡើងវិញ​លើ​ផ្ទៃដី​ចំនួន​ជាង ៣​ម៉ឺន ៤​ពាន់​ហិកតារ (៣៤.០០៧) ឋិត​នៅ​ក្នុង​ស្រុក​សំបូរ ខេត្ត​ក្រចេះ និង​មួយ​ផ្នែក​ចូល​ដី​ស្រុក​សៀម​បូក ខេត្ត​ស្ទឹងត្រែង។ ទន្ទឹម​នឹ​ងនេះ ក្រុមហ៊ុន ស៊ីងបាយអូថេក បាន​ធ្វើការ​ផ្ទេរសិទ្ធិ​បើក​រោងចក្រ​អារ​ឈើ​ទៅ​ឱ្យ​ក្រុមហ៊ុន អង្គរ​ប្លាយវូដ កាលពី​ចុង​ឆ្នាំ​២០១៨។

សហគមន៍​ព្រៃឡង់ រាយការណ៍​ថា ក្រុមហ៊ុន​ទាំងនេះ មាន​មហិច្ឆតា​ធ្វើ​អាជីវកម្ម​ឈើ​ខ្នាត​ធំ និង​នាំ​ចេញទៅ​លក់​នៅ​ប្រទេស​ចិន​តាម​ផ្លូវទឹក​។ សកម្មជន​បរិស្ថាន និង​សហគមន៍​ព្រៃ​ឡង់ ធ្លាប់​បាន​ទៅ​ដល់​ការដ្ឋាន​ក្រុមហ៊ុន​នេះ ប្រទះឃើញ ឈើ​មូល​ធំៗ​រាប់ពាន់​ម៉ែត្រ​គូប ត្រៀម​ដឹក​ចេញ​ក្រៅ ដែល​ភាគច្រើន​ជា​ប្រភេទ​ឈើទាល និង​ត្រាច ដែល​អ្នកស្រុក​ដុត​យក​ជ័រទឹក​លក់ ក្នុង​តំបន់​ព្រៃឡង់។

​មន្ត្រី​ពង្រឹង​សិទ្ធិ​អំណាច​សហគមន៍​នៃ​សមាគម​អាដហុក លោក ប៉ែន ប៊ុណ្ណារ៍ សោកស្ដាយ​ចំពោះ​ភាព​ព្រងើយកន្តើយ មិន​អនុវត្ត​ច្បាប់​ព្រៃឈើ របស់​មន្ត្រី​បរិស្ថាន​ដែល​មាន​តួនាទី​ការពារ​ព្រៃ​ឡង់​។ លោក​ចាត់​ទុក​ទង្វើ​របស់​មន្ត្រី​ជំនាញ​ទាំងនេះ ជា​អំពើ​ល្មើសច្បាប់ ដែល​ទាមទារ​ឱ្យ​ប្រជា​សហគមន៍​ត្រូវ​ក្លាហាន​រួមគ្នា ដាក់​បណ្ដឹង​បរិហារ​ទៅ​តុលាការ៖ «សូម​ឱ្យ​ប្រជា​សហគមន៍ និង​ពលរដ្ឋ​ចេះ​ប្រើ​សិទ្ធិ​តាម​ផ្លូវ​ច្បាប់​ដាក់​បណ្ដឹង​បរិហារ​លាយ​លក្ខណ៍​អក្សរ មាន​ស្ថាប័ន​ច្រើន​ណាស់ ដែល​យើង​ដាក់​បណ្ដឹង​បាន​។ រដ្ឋមន្ត្រី​ក្រសួង​យុត្តិធម៌​ក៏​ជា​កន្លែង​មួយ ដែល​យើង​ដាក់​បណ្ដឹង​បរិហារ​ទៅ ឯកឧត្ដម​រដ្ឋមន្ត្រី ឱ្យ​គាត់​បញ្ជា​ទៅ​។ យើង​ដាក់​បណ្ដឹង​ឱ្យ​ច្រើន​ទៅ យើង​អាច​ចោទ​ប្រកាន់​ថា អ្នក​ទាំង​អស់ហ្នឹង (​មន្ត្រី​ជំនាញ និង​អាជ្ញាធរ​ពាក់ព័ន្ធ​) បណ្ដែតបណ្ដោយ​តាម​ផ្លូវ​ច្បាប់»។

កាលពី​ខែ​កក្កដា ឆ្នាំ​២០២០ សកម្មជន​បរិស្ថាន ប្រជា​សហគមន៍ សមាគម និង​អង្គការ​សង្គម​ស៊ីវិល បាន​ចេញ​សេចក្តី​ថ្លែងការណ៍​បង្ហាញ​ពី​ក្តី​កង្វល់​រួម ស្រប​ពេល​ដែល​ក្រសួងបរិស្ថាន​រឹតត្បិត និង​រារាំង​សហគមន៍​មូលដ្ឋាន​មិន​ឱ្យ​ចុះ​ល្បាត​ព្រៃ ក្រោម​ហេតុផល តំបន់​ស្នូល ក៏ប៉ុន្តែ​អ្នក​កាប់​ឈើ​បែរជា​ចូល​ព្រៃ​អារ​ឈើ​បាន​ដោយ​សេរី​។ ពួកគេ​សង្កេត​ឃើញ​ថា សកម្មភាព​កាប់​បំផ្លាញ​ព្រៃ​ឡង់​កំពុង​កើន​ឡើង​ទ្វេដង ក្នុង​ពេល​ដែល​ក្រសួង​រឹតត្បិត និង​រារាំង​សហគមន៍ ដោយសារ​គ្មាន​អ្នកឃ្លាំមើល និង​តាមដាន បទល្មើស​ព្រៃឈើ ហើយ​មន្ត្រី​បរិស្ថាន​បាន​ជិះ​សេះ​លែងដៃ មិន​អើពើ​បង្ក្រាប​បទល្មើស​ធន​ធាន​ធម្មជាតិ៕

No comments: