April 21, 2018

លោក​ ​ហ៊ុន សែន​ ​ព្រមាន​ប្រើ​កណ្ដាប់​ដៃ​ដែក​ដល់​មន្ត្រី​អសកម្ម​ ​ខណៈ​ ការ​បោះឆ្នោត​ខិត​ជិត​មក​ដល់

រូបឯកសារ៖ លោកនាយករដ្ឋមន្ត្រី​ ហ៊ុន សែន និយាយទៅកាន់​សមាជិកក្រុមប្រឹក្សាឃំុសង្កាត់

កាន់ វិច្ឆិកា VOA Khmer 20 មេសា 2018

ក្រោយពេលដែលលោកបានបោះឆ្នោតហើយសម្រាប់ការបោះឆ្នោតជ្រើសរើសសមាជិកព្រឹទ្ធសភា នៅខេត្តកណ្តាល កាលពីថ្ងៃទី២៥
ខណៈ​​សេវា​សាធារណៈ​ ​ព្រមទាំង​ភាព​អសកម្ម​ផ្សេងៗ​របស់​មន្ត្រី​រាជការ​នៅ​តែ​ជា​បញ្ហា​ចោទ​ នៅ​ថ្ងៃសុក្រ​នេះ​ ​លោក​នាយក​រដ្ឋមន្ត្រី​បាន​ក្រើន​រំឭក​មន្ត្រី​ក្រោម​ឱវាទ​របស់​លោក​ជាថ្មី​ទៀត​ ​ដោយ​ព្រមាន​វះកាត់​​មន្ត្រី​អសកម្ម​ទាំង​នោះ​ចោល​តែ​ម្ដង។

ភ្នំពេញ — លោក​នាយក​រដ្ឋមន្ត្រី​ ​ហ៊ុន សែន​ ​នៅ​ព្រឹក​ថ្ងៃសុក្រ​នេះ​ ​ក្រើន​រំឭក​មន្ត្រី​ក្រោម​ឱវាទជា​ថ្មី​ម្ដង​ទៀត​ ​ដោយ​ព្រមាន​ដកមន្ត្រី​អសកម្ម​ចេញ​ពី​ជួរ​រដ្ឋាភិបាល​ ​ដើម្បី​កុំ​ឲ្យ​អ្នក​ទាំង​នោះ​បង្ក​ជា​អ្វី​មួយ​ ដែល​លោក​ហៅ​ថា​ជា​ដំបៅ​មហារីក‍ ខណៈ​ការបោះឆ្នោត​ជាតិ​កាន់តែ​ខិត​ជិត​មកដល់។​

លោក​នាយក​រដ្ឋ​មន្ត្រី​ថ្លែង​បែប​នេះ​ នៅ​ក្នុង​កិច្ច​ប្រជុំ​ត្រួត​ពិនិត្យ​ប្រចាំ​ឆ្នាំ​២០១៧​ ​និង​ការ​វាយ​តម្លៃ​សមិទ្ធ​ផល​៥ឆ្នាំ​នៃ​ការ​អនុវត្ត​កម្មវិធី​កែ​ទម្រង់​ការគ្រប់គ្រង​ហិរញ្ញវត្ថុ​សាធារណៈ​ ​និង​ប្រកាស​ដាក់​ឲ្យ​អនុវត្ត​យុទ្ធ​សាស្ត្រ​នៃ​ការកែទម្រង់​ប្រព័ន្ធ​ថវិកា​ឆ្នាំ​២០១៨​ ​ដល់​ឆ្នាំ២០២៥។

លោក​ ហ៊ុន សែន លើក​ឡើង​ថា ការ​ចូលរួម​របស់​ប្រជាជន​ក្នុង​ការ​រក្សា​សន្តិភាព​ ​និង​ការ​អភិវឌ្ឍ​ ​គឺ​ជា​កម្លាំង​ដែល​ជា​ធ្វើឲ្យ​ការ​ប៉ុនប៉ង​រុញ​ច្រានកម្ពុជា​ឲ្យធ្លាក់​ចូល​ក្នុង​ភាព​ចលាចល​ ​និង​ភាព​វឹកវរ​ផ្នែក​នយោបាយ​ទាំងឡាយ​ ​ត្រូវ​ទទួល​បរាជ័យ។​

លោក​នាយក​រដ្ឋមន្ត្រី​ ​បន្ថែម​ថា​ ភាព​ជោគជ័យ​នៃ​សន្តិភាព​ ​និង​ស្ថិរភាព​នយោបាយ​នេះ​ ​ជា​លក្ខខណ្ឌ​ដ៏​ចម្បង​ ​និង​សំខាន់​បំផុត​នៃ​ស្ថិរភាព​ម៉ាក្រូ​សេដ្ឋកិច្ច​របស់​កម្ពុ​ជា​ ​និង​ជា​លក្ខខណ្ឌ​ចាំបាច់​ ​សម្រាប់​ជំរុញ​ឲ្យ​មាន​វឌ្ឍនភាព​ ​និង​ការ​អភិវឌ្ឍ​ក្នុង​សង្គម។

លោក​បន្ត​ថា​ សក្ដានុពល​សេដ្ឋកិច្ច​កម្ពុជា​ពេល​នេះ​ ​ត្រូវ​បាន​គេ​ទទួល​ស្គាល់​ ​និង​ចាត់​ទុក​ថា​ជា «ខ្លា​សេដ្ឋកិច្ច» ថ្មី​មួយ​នៅ​តំបន់​អាស៊ី។​

លោក​នាយក​រដ្ឋមន្ត្រី​ដែល​កាន់អំណាច​ជិត​៤០​ឆ្នាំ​រូប​នេះ​ បន្ថែម​ថា​ ​បើ​ទោះ​បី​ជា​កម្ពុជា​សម្រេច​បាន​នូវ​ម៉ាក្រូ​សេដ្ឋកិច្ច និង​គ្រប់គ្រង​ថវិកា​ជាតិ​មាន​ប្រសិទ្ធភាព​ជាង​មុន​ក្ដី ក៏​លោក​ថា គណៈកម្មាធិការ​ដឹក​នាំ​ការងារ​កែ​ទម្រង់​ការ​គ្រប់គ្រង​ហិរញ្ញវត្ថុ​សាធារណៈ​ ​ត្រូវ​បន្ត​ជំរុញ​គណនេយ្យភាព​សម្រាប់​ការ​អនុវត្ត​យុទ្ធសាស្ត្រ​នៃ​ការ​កែទម្រង់ប្រព័ន្ធ​ថវិកា​ឆ្នាំ២០១៨-២០២៥​ ​និង​ត្រូវ​បន្ត​អនុវត្ត​គោល​ការណ៍ «ឆ្លុះ​កញ្ចក់ ងូតទឹក​ ដុសក្អែល ​ព្យាបាល​ ​និង​វះកាត់»។

លោក​មាន​ប្រសាសន៍​ថា៖

«ចាប់ពី​ចុង​ឆ្នាំ​២០១៧​មក​ ​យើង​បាន​ដាក់​ចេញ​នូវ​ចំណុច​សំខាន់​មួយ​ទៀត​គឺ​ការ​វះកាត់​តែ​ម្ដង គឺ​មិន​អាច​ត្រឹមតែ​ព្យាបាល​ហើយ​ទុក​បន្ត​ជា​ជំងឺ​រ៉ាំរ៉ៃ​តទៅ​ទៀត​ទេ។ នេះ​ជា​ចំណុច​សូម​រំឭក​ដាស់​តឿន​សារ​ជាថ្មី​ម្ដង​ទៀត នៅ​ក្នុង​ចំណោម​មន្ត្រី​របស់​យើង។ គឺ​ចាំបាច់​ណាស់​ការ​វះកាត់ ដើម្បី​ឆ្លើយ​តប​ទៅ​នឹង​គឺ​មិន​អាច​ទុក​ឲ្យ​ជំងឺ​រ៉ាំរ៉ៃ​នេះ​នៅ​បន្ត​រហូត​ទៅ​ជា​ជំងឺ​មហារីក​រហូត​ដល់​ទៅ​ងាប់​ខ្លួន​នោះ​ទេ»។

នេះ​មិនមែន​ជា​លើក​ទី​មួយ​ទេ​ដែល​លោក​នាយក​រដ្ឋមន្ត្រី​ព្រមាន​មន្ត្រី​ក្រោម​ឱវាទ​ ឲ្យ​អនុវត្ត​ការងារ​ឲ្យ​បាន​ត្រឹមត្រូវ​ ​និង​សកម្ម​ជាង​មុន​ ​នៅ​ប៉ុន្មាន​ឆ្នាំ​ចុង​ក្រោយ​នេះ។

ទោះ​យ៉ាង​ណា​ ​អ្នកឃ្លាំមើល​ស្ថានការណ៍​សង្គម​យល់​ថា ការ​ប្រកាស​ព្រមាន ឬ​ក្រើន​រំឭក​របស់​លោក​នាយក​រដ្ឋមន្ត្រី​ដែល​កាន់​អំណាច​ជិត​៤០​ឆ្នាំ​រូប​នេះ​ ​ហាក់​ទទួល​បាន​ប្រសិទ្ធ​ភាព​តិចតួច​នៅ​ឡើយ។

​លោក​ ​សន ជ័យ​ ​នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​ ​ប្រាប់​ ​VOA​ ​នា​រសៀល​ថ្ងៃ​សុក្រ​នេះ​ថា ការ​រំឭក​របស់​លោក​នាយក​រដ្ឋមន្ត្រី​ ​ហ៊ុន សែន​ ​ដែល​លោក​តែង​ធ្វើ​ដដែលៗ​នេះ​ ​នឹង​មិន​អាច​ទទួល​បាន​ប្រសិទ្ធ​ភាព​នោះ​ទេ​ ​ប្រសិន​បើ​រដ្ឋាភិបាល​មិន​មាន​ឆន្ទៈ​ក្នុង​ការ​អនុវត្ត។

លោក​បន្ថែម​ថា​ ​វិធានការ​វះកាត់​ ​ឬ​ដក​ចោល​នូវ​មន្ត្រី​រដ្ឋាភិបាល​ដែល​អសកម្ម​ ​គួរតែ​អនុវត្ត​ពី​កម្រិត​ថ្នាក់​លើ​មក​មុន។​

លោក​បញ្ជាក់​ថា៖​

«ការ​អនុវត្ត​ពី​កម្រិត​ថ្នាក់​លើ​មក​មុន​ ​ខ្ញុំ​នៅ​តែ​យល់ថា​ទើប​មាន​ប្រយោជន៍ ពីព្រោះ​អី​ការ​អនុវត្ត​ច្បាប់​ហ្នឹង​គេ​មើល​ពី​ថ្នាក់​លើ​មុន​ ​ហើយ​ថ្នាក់​ក្រោម​គ្រាន់តែ​ជា​អ្នក​អនុវត្ត​បន្ត​ហើយ​ជា​អ្នក​ទទួល​ទេ។​ ​អញ្ចឹង​បើ​ថ្នាក់​លើ​អត់​មាន​គំរូ​ ​អត់​មាន​ឆន្ទៈ​ច្បាស់​លាស់​ទេ​ ​ថ្នាក់​ក្រោម​ក៏មិន​អាច​មាន​ឥទ្ធិពល​ ​ឬ​ក៏​មិន​អាច​មាន​ការ​អនុវត្ត​មួយ​ត្រឹមត្រូវ​ល្អ​ដែរ»។

ក្រៅ​តែ​ពី​ការ​ក្រើន​រំឭក​ ​និង​ព្រមាន​ជាច្រើន​ដង​ ​ឲ្យ​មន្ត្រី​ក្រោម​ឱវាទ​មាន​ភាព​សកម្ម​ក្នុង​ការងារ នា​ពេលថ្មីៗ​នេះ​ ​លោក​នាយក​រដ្ឋមន្ត្រី​ ​ហ៊ុន សែន​ ​ក៏​បាន​ចុះ​សួរសុខទុក្ខ​ ​និង​សំណេះ​សំណាល​កម្មករ​ក្នុង​វិស័យ​កាត់ដេរ គ្រូបង្រៀន មន្ត្រី​រាជការ ស្ទើរ​រៀងរាល់​សប្ដាហ៍​ ​ខណៈ​ដែល​ការ​បោះឆ្នោត​ជ្រើសតាំង​តំណាង​រាស្ត្រ​អាណត្តិ​ទី៦ គ្រោង​នឹង​ធ្វើ​ឡើង​នៅ​ថ្ងៃទី២៩ ខែ​កក្កដា ឆ្នាំ២០១៨​ ​ខាងមុខ​នេះ។

លោក​ ​មាស នី​ ​អ្នក​សិក្សា​ពី​ការ​អភិវឌ្ឍ​សង្គម និង​ជា​អ្នកវិភាគ​នយោបាយ​ឯករាជ្យ​មាន​ប្រសាសន៍​ថា ការ​ប្រកាស​ធ្វើ​កំណែទម្រង់​មន្ត្រី​ក្រោម​ឱវាទ​ឲ្យ​ខំ​ប្រឹង​ធ្វើ​ការងារ​ឡើងវិញ​ឲ្យ​មាន​ប្រសិទ្ធភាព​ លុះ​ត្រា​តែ​រដ្ឋាភិបាល​កាត់​បន្ថយ​មន្ត្រី​មាន​អំណាច​ជាន់ខ្ពស់ ដែល​ធ្វើ​ការងារ​ជា​បក្សពួក និង​ផ្ដល់​ប្រាក់​បៀរវត្សសមរម្យ​ដល់​មន្ត្រី​រាជការ។​

ទោះ​យ៉ាង​ណា​ ​លោក​ ​មាស នី​ ​យល់​ថា ការ​ប្រកាស​កំណែ​ទម្រង់​មន្ត្រី​ក្រោម​ឱវាទ​ក្នុង​ការ​ពង្រឹង​ភាព​សកម្មក្នុង​ការ​ងារ​ ​គឺជាការ​ទាក់ទាញការ​គាំទ្រ​ពី​ប្រជាពលរដ្ឋ​ ​បន្ទាប់ពី​គណបក្ស​កាន់​អំណាច​ក្នុង​អាណត្តិ​ចុង​ក្រោយ​ ​បាន​បាត់បង់​សំឡេង​យ៉ាង​ច្រើន​នា​ពេល​កន្លងមក។

លោក​បន្ថែម​ថា​ ​ការ​ទាក់​ទាញ​ការ​គាំទ្រ​ពី​ប្រជាពលរដ្ឋ​វិញ​បាន​ ​លុះ​ត្រាតែ​រដ្ឋាភិបាល​ពង្រឹង​ឲ្យ​បាន​នូវ​វិស័យ​យុត្តិធម៌​ក្នុង​ប្រទេស​កម្ពុជា។​

លោក​បញ្ជាក់​ថា៖​

​«បើ​សិន​ជា​ខំ​តែ​កំណែ​ទម្រង់​ការ​យក​ចិត្ត​ពលរដ្ឋ​ទៅ​តាមរយៈ​ការ​ផ្ដល់​លុយ​ផ្ដល់​កាក់​ ​ឬ​ការ​បង្កើន​បៀវត្ស​នៅ​មុន​ពេល​បោះឆ្នោត​ ​ក៏​ប៉ុន្តែ​ប្រព័ន្ធ​យុត្តិធម៌​នៅ​តែ​មិន​អាច​បំពេញ​តួនាទី​ឯករាជ្យ​ ​និង​ផ្ដល់​យុត្តិធម៌ជូន​ពលរដ្ឋ​បាន​នោះ​ ​អា​ហ្នឹង​ទោះបីជា​ថែម​កម្លាំង​ប៉ុន្មាន​ទៀត​ក៏​មិន​អាច​ធ្វើ​ឲ្យ​ការ​បង្កើន​នូវ​ទំនុក​ចិត្ត​ពី​ពលរដ្ឋ​ ​នៅ​តែ​មាន​ការ​ពិបាក។​ ​បើ​កាលណា​អំពើ​អយុត្តិធម៌​វា​រីក​រាល​ដាល​ហើយ​នោះ​ ​គឺ​អ្វីៗ​ក៏​វា​ត្រូវ​តែ​មាន​ភាព​ច្របូក​ច្របល់​ដែរ​សម្រាប់​សង្គម​ហ្នឹង​ ​ហើយ​ការ​មិន​សប្បាយ​ចិត្ត​របស់​មនុស្ស​នឹង​នៅ​តែ​បន្ត​ទៅ​ទៀត»។​

សន្ទស្សន៍​នៃ​ការ​យល់​ឃើញ​ពី​អំពើ​ពុករលួយ​ឆ្នាំ​២០១៧​ ​ដែល​បាន​ចេញ​ផ្សាយ​ដោយ​អង្គការ​តម្លាភាព​អន្តរជាតិ​ ​ចេញ​កាល​ពី​ខែ​កុម្ភៈ​នេះ បង្ហាញ​ថា ​ប្រទេស​កម្ពុជា​ស្ថិត​ក្នុង​ចំណាត់​ថ្នាក់​ទី​១៦១​ ក្នុង​ចំណោម​ប្រទេស​១៨០​ ​ដែល​អង្គការ​នេះ​ ​បាន​សិក្សា​ស្រាវជ្រាវ​អំពី​ការ​យល់​ឃើញ​លើ​អំពើ​ពុករលួយ​ក្នុង​វិស័យ​សាធារណៈ។​ ​ក្នុង​នោះ​ ​កម្ពុជា​ឈរ​ក្នុង​លំដាប់​ថ្នាក់​ទាប​ជាង​គេ​បំផុត​ក្នុង​ចំណោម​ប្រទេស​ជា​សមាជិក​អាស៊ាន​ទាំង​១០។​

ចំណែក​ការ​ស្ទង់មតិ​មួយ​ស្ដី​អំពី​អំពើ​ពុករលួយ​ក្នុង​ប្រព័ន្ធ​តុលាការ​ ​នៅ​ទូទាំង​សកលលោក​របស់​កម្មវិធី​អភិវឌ្ឍន៍​អង្គការ​សហប្រជាជាតិ​ ​(UNDP)​ ​ដែល​បាន​ចេញ​ផ្សាយ​កាលពី​ខែ​មេសា​ ​ឆ្នាំ​២០១៦​ បញ្ជាក់​ថា​ ​ប្រព័ន្ធ​តុលាការ​នៅ​កម្ពុជា​ ​ជា​ប្រព័ន្ធ​ដែល​មាន​ភាព​ពុក​រលួយ​បំផុត​ក្នុង​ចំណោម​ស្ថាប័ន​រដ្ឋ៕

2 comments:

KhmerBTB said...

There is nothing else that you can do to make it better . We heard the same thing again and again in the last 30 years or so but nothing has been changed .

Justic Justice said...

Chinese and VC Vietnamese are after his ass. They will kill him and will blame it on CNRM, just like always. They created Pol Pot and Lon Nol to verse one another, Hun Sen, Hang Sarin, Chea Sim Vs Funcipic, then Vs Sam Rainsy then Vs CNRP etc. and in the end, they blamed on khmers killing khmers. Communists are very good at their evil tactics and tricks. Their planned is to conquer the whole Southeast Asia, by destroy it all one by one. Right now, chicken already taking over Hanoi city and is already using their currency. Sooner or later they migrate in by the millions known as rust kills steel. Vietnamese will be no more in 20 years. They will kill them all by using all kinds of poisonous foods.

So, Hun Sen, you have to know this, they are way tooo smart in term of getting everything in Cambodia. They are not after your money but after the whole continent. So, no amount of money can save your soul. You are finished. Remember this, Xi Xingping hated corrupted leaders and have imprisonment them all for the last 10 years also and your family will be next in line. Chinese are not stupid. They do have their own morals. So it is a matter of time, your dynasty too will pay the price. Xi Xingping is a very powerful leader who can put you down in 1 hour. And he is focusing on Chinese national interest no more or less.

So, stop being so foolish as to be called strongman of Cambodia. For they are laughing at you and thinking of you as a mad dog. So dumb,