April 16, 2018

គ្រោះថ្នាក់​ចរាចរណ៍​រយៈពេល​ពីរ​ថ្ងៃ​នៃ​បុណ្យ​ចូលឆ្នាំ​មាន​អ្នក​ស្លាប់​យ៉ាង​ហោច​១៩​នាក់

គ្រោះថ្នាក់​ចរាចរណ៍ ប្រចាំ​ថ្ងៃ​ទី​០៥ ខែវិច្ឆិកា ឆ្នាំ​២០១៤ បណ្តាលឲ្យ​មនុស្ស​ស្លាប់ ១១​នាក់ របួស​ធ្ងន់​ស្រាល ១១​នាក់។  Photo: Courtesy of Police

ដោយ មាន ឫទ្ធិ RFA 2018-04-15

របាយការណ៍​បឋមរ​បស់​នាយកដ្ឋាន​នគរបាល​ចរាចរណ៍ និង​សណ្តាប់ធ្នាប់​សាធារណៈ ឲ្យ​ដឹងថា ក្នុង​ថ្ងៃទីពីរ នៃ​ពិធីបុណ្យ​ចូលឆ្នាំ​ខ្មែរ គឺ​ថ្ងៃទី​១៥ មេសា​នេះ មាន​ករណី​គ្រោះថ្នាក់​ចរាចរណ៍ ចំនួន ២៤​ករណី កើតមានឡើង​នៅ​ទូទាំងប្រទេស ក្នុងនោះ​បណ្តាល​ឲ្យ​ពលរដ្ឋ ១៣​នាក់​ស្លាប់ របួសធ្ងន់ ២៨​នាក់ និង​របួសស្រាល ៦​នាក់។ ករណី​គ្រោះថ្នាក់​ចរាចរណ៍​ទាំងនេះ កើតមានឡើង​ភាគច្រើន​នៅ​ខេត្ត​កែប កំពង់ចាម កំពង់ធំ កំពត ក្រចេះ តាកែវ ព្រះវិហារ បាត់ដំបង និង​ខេត្ត​កំពង់ស្ពឺ ដោយសារ​ការ​បើកបរ​លើស​ល្បឿន​កំណត់ ការមិន​គោរព​សិទ្ធិ​បើកបរ ការ​ប្រជែង​គ្នា ឥទ្ធិពល​គ្រឿង​ស្រវឹង និង​ការបើកបរ​មិន​ប្រកាន់​ស្តាំ ជាដើម។

ដោយឡែក សម្រាប់​ថ្ងៃទី​១ នៃ​ពិធីបុណ្យ​ចូលឆ្នាំ​ខ្មែរ គឺ​ថ្ងៃទី​១៤ មេសា មាន​ករណី​គ្រោះថ្នាក់​ចរាចរណ៍​ចំនួន ១៤​លើក កើតមានឡើង​នៅ​ទូទាំងប្រទេស ក្នុង​នោះ បាន​បណ្តាល​ឲ្យ ពលរដ្ឋ ៦​នាក់​ស្លាប់ រងរបួស​ធ្ងន់​១១​នាក់ និង​រងរបួស​ស្រាល ១៤​នាក់។ ករណី​គ្រោះថ្នាក់​ចរាចរណ៍​នៅ​ថ្ងៃទី​១ នៃ​ពិធីបុណ្យ​ចូលឆ្នាំ​នេះ កើត​មាន​នៅ​ខេត្តបន្ទាយមានជ័យ ព្រះវិហារ តាកែវ និង​ខេត្ត​ត្បូងឃ្មុំ។

តួលេខ​បឋម​សរុប សម្រាប់​រយៈពេល​ពីរ​ថ្ងៃ នៃ​ពិធីបុណ្យ​ចូលឆ្នាំថ្មី គឺ​ចាប់ពី​ថ្ងៃទី​១៤ ដល់​ថ្ងៃទី​១៥ មេសា​នេះ មាន​ពលរដ្ឋ​យ៉ាងហោចណាស់ ១៩​នាក់ បាន​ស្លាប់ និង ៥៩​នាក់​រងរបួស នៅ​ទូទាំង​ប្រទេស៕

No comments: